மொபைல் போன் வெடிப்பதற்கான காரணம் என்ன ? பாதுகாப்பாக பயன்படுத்துவது எப்படி?

மொபைல் போன்கள் (Mobile Phone) நம் வாழ்க்கையின் அடிப்படை தேவைகளில் ஒன்றாக மாறியிருக்கிறது.  மொபைல் போன்களினால் எவ்வளவு நன்மைகள் இருக்கிறதோ, அதனால் சில ஆபத்துகளும் இருக்கின்றன.  குறிப்பாக மொபைல்போன் வெடித்து விபத்து போன்ற செய்திகளை அடிக்கடி பார்த்திருப்போம். அப்போதெல்லாம் நமது போனும் வெடிக்குமா என்ற கேள்வி எழும். அதிக வெப்பம்,  தவறான சார்ஜிங், பேட்டரி (Battery) குறைபாடுகள், தயாரிப்பு குறைகள் போன்ற காரணங்களால் மொபைல் போன் வெடிக்கலாம்.  நமது மொபைல் போன்கள் வெடிப்பதற்கான காரணங்கள் மற்றும் அதனை தவிர்ப்பது என்பது குறித்து இந்த கட்டுரையில் பார்க்கலாம்.

மொபைல்போன்கள் வெடிப்பதற்கு காரணங்கள்:

போன் வெடிப்பதற்கு முக்கிய காரணமாக பேட்டரி பிரச்னைகள் இருக்கின்றன. பெரும்பாலான ஸ்மார்ட்போன்கள் லிதியம்-ஐயான் பேட்டரிகளை பயன்படுத்துகின்றன. இது மிகுந்த செயல்திறனை அளிக்கிறது. பேட்டரி சேதம் அடையும் போதோ, நீண்ட நேரம் சார்ஜ் செய்யப்படும் போதோ அல்லது கடுமையான வெப்பநிலைகளுக்கு உட்படுத்தப்படும் போதோ,  பேட்டரி வெடிப்பதற்கு அதிக வாய்ப்பிருக்கிறது.

சில நேரங்களில், தயாரிக்கப்படும்போது தவறான பேட்டரிகள் பொருத்தப்படுவது நடக்கும். இதுபோன்ற தருணங்களில் பேட்டரி வெடிக்கும் அபாயத்தை அதிகரிக்கும்.  ஆனால் இது மிகவும் அரிதானது. இதன் காரணமாக தயாரிப்பு நிறுவனங்கள் சில மாடல்களை திரும்பப் பெறும் நிகழ்வுகளும் நடந்திருக்கின்றன.

மொபைல் போன் கீழே விழுந்து சேதமடைந்தால், அது பேட்டரியை பாதிக்கும். மேலும் வெளிப்புற சேதம் போனின் உள்ளமைப்பை பாதித்து அதை வெடிப்பதற்கான மாறக்கூடும். உங்கள் போனை அதிகமாக சார்ஜ் செய்வது அல்லது  தரமற்ற சார்ஜிங் கேபிள்களை பயன்படுத்துவது அதிக வெப்பத்தை உருவாக்கலாம். உங்கள் போனை இரவு முழுவதும் சார்ஜ் செய்யவோ அல்லது பொருத்தமற்ற சார்ஜர்களை பயன்படுத்தவோ செய்வதால் உஷ்ணம் அதிகரிக்கவும் பேட்டரி பாதிக்கவும் வாய்ப்பு உள்ளது.

மொபைல் போன்களை பாதுகாப்பாக பயன்படுத்துவது எப்படி?

• எப்போதும் உங்கள் போனுடன் வந்த சார்ஜரை பயன்படுத்தவும்.  இல்லையெனில் அதிகாரப்பூர்வ தயாரிப்பு நிறுவனத்திடம் இருந்து சார்ஜரை வாங்கவும்.
• தரமற்ற சார்ஜர்களை பயன்படுத்துவது போனை ஹீட்டாக்குவதுடன் பேட்டரி சேதத்தையும் ஏற்படுத்தக்கூடும்.
• எப்பொழுதும் 100 சதவிகிதம் சார்ஜ் செய்ய வேண்டாம்.
• உங்கள் போனை கடுமையான வெப்பநிலைகளில் அல்லது நேரடியாக சூரிய வெப்பத்தை எதிர்கொள்கின்ற இடங்களில் பயன்படுத்துவதை தவிர்க்கவும். இது பேட்டரியினை அதிகமாக சூடாக்கி விபத்து ஏற்பட வாய்ப்பை அதிகரிக்கும்.
• உங்கள் போன் பேட்டரி பாதிப்பு இருப்பது தெரிந்தாலோ அல்லது லீக்காக இருந்தாலோ உடனே பயன்படுத்துவதை நிறுத்தி உடனடியாக சர்வீஸ் சென்டர்களில் கொடுத்து மாற்றவும்.
• தரமான போன் கேஸ் மற்றும் டெம்பர் கிளாஸை மாற்றவும். இதன் காரணமாக உங்கள் போன் சூடாவது குறையும்.

(Disclaimer : இணையத்தில் இருந்து சேகரிக்கப்பட்ட தகவல்களின் அடிப்படையில் இந்த விவரங்கள் கொடுக்கப்பட்டுள்ளன. உள்ளடக்கங்கள் தகவலுக்காக மட்டுமே. முயற்சிக்கும் முன் தொடர்புடைய நிபுணர்களின் ஆலோசனையைப் பெறவும். எந்த விளைவுகளுக்கும் TV9Tamil பொறுப்பேற்காது.)