குடிநீர் குடித்து யாரும் உயிரிழக்கவில்லை: மாநகராட்சி ஆணையர் விளக்கம்

திருச்சி ஏப்ரல் 20: திருச்சி மாநகராட்சிக்கு உட்பட்ட உறையூர், பனிக்கன்தெரு, காமாட்சி அம்மன் தெரு உள்ளிட்ட பகுதிகளில் 15 நாட்களுக்கு மேலாக குடிநீரில் கழிவுநீர் கலப்பதாக பொதுமக்கள் போராட்டம் நடத்தினர். மாநகராட்சி அதிகாரிகள், குடிநீர் மாதிரி எடுத்து ஆய்வு மேற்கொண்டனர். 2025 ஏப்ரல் 19 நேற்றும் 4½ வயது பெண் குழந்தை மற்றும் 2 பெண்கள் உயிரிழந்ததாக தகவல் பரவியது. ஆனால், விசாரணையில் குழந்தை பாரம்பரிய சிகிச்சையால் இறந்தது என தெரியவந்துள்ளது. குடிநீரில் தொற்று இல்லை என முதற்கட்ட ஆய்வில் கண்டறியப்பட்டுள்ளது. பொதுமக்களிடம், வயிற்றுப்போக்கு அறிகுறிகள் இருந்தால், மாநகராட்சி மருத்துவமனைகளை அணுகுமாறு கேட்டுக்கொள்ளப்பட்டது.

குடிநீரில் கழிவுநீர் கலப்பதாக கூறி பொதுமக்கள் திடீரென போராட்டம்

திருச்சி மாநகராட்சிக்கு உட்பட்ட உறையூர் மின்னப்பன்தெரு, பனிக்கன்தெரு, காமாட்சி அம்மன் தெரு, நெசவாளர் தெரு, காளையன் தெரு உள்ளிட்ட பகுதிகளில் கடந்த 15 நாட்களுக்கு மேலாக குடிநீரில் கழிவுநீர் கலப்பதாக கூறி பொதுமக்கள் திடீரென போராட்டத்தில் ஈடுபட்டனர். இதனால் அந்த பகுதிகளில் பரபரப்பு ஏற்பட்டது. சம்பவம் குறித்து தகவல் அறிந்த உறையூர் போலீசார், சம்பவ இடத்திற்கு சென்று போராட்டத்தில் ஈடுபட்டவர்களிடம் பேச்சுவார்த்தை நடத்தினர்.

கழிவுநீர் குடிநீர் குடித்து மூவர் உயிரிழந்ததாக தகவல்

பின்னர், மாநகராட்சி அதிகாரிகள் அந்த பகுதிக்கு சென்று குடிநீர் மாதிரி எடுத்து ஆய்வுக்கு அனுப்பினர். இதற்கான முன்னணி நடவடிக்கைகள் இல்லாததால், பொதுமக்கள் மாநகராட்சி அதிகாரிகள் மற்றும் வார்டு கவுன்சிலரிடம் புகார் மனு அளித்தும் எந்தவொரு நடவடிக்கையும் எடுக்கப்படவில்லை என கூறப்படுகிறது.
மேலும், 2025 ஏப்ரல் 19 நேற்றும் திருச்சி அரசு மருத்துவமனையில் சிகிச்சை பலனின்றி 4½ வயது பெண் குழந்தை மற்றும் 2 பெண்கள் உள்பட 3 பேர் உயிரிழந்ததாக தகவல் பரவியது. இதனால் பரபரப்பு ஏற்பட்டது.

திருச்சி மாநகராட்சி ஆணையர் சரவணன் விளக்கம்

இந்த நிலையில், மாநகராட்சி ஆணையர் சரவணன் கூறுகையில், கழிவுநீர் கலந்த குடிநீரை குடித்து இறந்ததாக கூறப்படும் 4½ வயது குழந்தை வண்ணாங்கோவில் பகுதியில் பாரம்பரிய முறையில் ஓதல், வயிற்று தொக்கு நீக்குதல் சிகிச்சை வழங்கப்பட்டதால் ஒவ்வாமை ஏற்பட்டு இறந்ததாக முதற்கட்ட விசாரணையில் தெரிய வந்துள்ளது. மேலும், அந்த பகுதியில் கோவில் திருவிழாவின்போது நடைபெற்ற அன்னதானம் வழங்கும் நிகழ்ச்சியில் வழங்கப்பட்ட உணவுகளால் ஒவ்வாமை ஏற்பட்டதன் மூலம் வாந்தி மற்றும் வயிற்றுப்போக்கு ஏற்பட்டிருப்பதாக சந்தேகிக்கப்படுகிறது.

முதற்கட்ட மருத்துவ ஆய்வில் குடிநீர் மூலம் தொற்று ஏதும் இல்லை

மாநகராட்சி பணியாளர்கள் மற்றும் எந்திரங்கள் கொண்டு குடிநீர் வினியோகம் செய்யும் குழாயில் ஆய்வு மேற்கொள்ளப்பட்டு, அந்த பகுதியில் குடிநீர் மாதிரிகள் எடுக்கப்பட்டு ஆய்வுக்கு அனுப்பப்பட்டுள்ளன. முதற்கட்ட மருத்துவ ஆய்வில் குடிநீர் மூலம் தொற்று ஏதும் இல்லை என கண்டறியப்பட்டுள்ளது. எனவே, மாநகராட்சி பகுதிகளில் வயிற்றுப்போக்கு அறிகுறிகள் தென்பட்டால் உடனடியாக மாநகராட்சி மருத்துவமனைகளை அணுகுமாறு பொதுமக்களிடம் அறிவுறுத்தப்பட்டுள்ளது.