பழநியில் மூன்று நாட்களுக்கு கட்டண தரிசனம் ரத்து..! எந்தெந்த நாட்கள் தெரியுமா?

பழநி கோவிலில் 3 நாட்கள் கட்டணமின்றி தரிசனம்

பழநி ஏப்ரல் 09: பழநி தண்டாயுதபாணி சுவாமி கோயிலில் (Palani Thandayutapani Swamy Temple) நடைபெறும் பங்குனி உத்திர திருவிழாவை (Panguni Uttara Festival) முன்னிட்டு, 2025 ஏப்ரல் 11 முதல் 2025 ஏப்ரல் 13ம் தேதி வரை கட்டண தரிசனம் ரத்து செய்யப்படும் என அறிவிக்கப்பட்டுள்ளது. இந்த அறிவிப்பு, தமிழக சட்டசபையில் அறநிலையத்துறை அமைச்சர் பி.கே. சேகர்பாபு (Hindu Religious and Charitable Endowments Minister Sekar Babu) மூலம் வெளியிடப்பட்டது. சட்டப்பேரவையில் கேள்வி நேரத்தில் பேசிய பூந்தமல்லி தொகுதியைச் சேர்ந்த திமுக உறுப்பினர் ஆ. கிருஷ்ணசாமி, “இந்த மாதம் பங்குனி மாதமாகும். பங்குனி உத்திரத்தில் முருகனை தரிசிக்க பல லட்சம் பக்தர்கள் பழநிக்கு பயணிக்கிறார்கள். கடந்த தைப்பூசத் திருவிழாவின் போது பழநி கோவிலில் மூன்று நாட்களுக்கு கட்டணமில்லா தரிசனம் வழங்கப்பட்டது. அதைப் போலவே இந்த பங்குனி உத்திரத்திற்கும் முருக பக்தர்களுக்காக கட்டணமில்லா தரிசன வசதியை ஏற்பாடு செய்வீர்களா?” எனக் கேள்வி எழுப்பி இருந்தார்.

பழநியில் பங்குனி உத்திர திருவிழா

முருகனின் அறுபடை வீடுகளில் மூன்றாவது படை வீடாக உள்ள பழநி முருகன் கோவிலில் பங்குனி உத்திர திருவிழா கடந்த 2025 ஏப்ரல் 5ம் தேதி கொடியேற்றத்துடன் தொடங்கியது. இந்த விழா 10 நாட்கள் நடைபெறுகிறது. விழாவின் முக்கிய நிகழ்வுகளில் 2025 ஏப்ரல் 11ம் தேதி முத்துக்குமாரசுவாமி, வள்ளி, தெய்வானை திருமணம் மற்றும் மாலை 4.30 மணிக்கு திருத்தேரோட்டம் நடைபெறும். விழா 2025 ஏப்ரல் 14ம் தேதி நிறைவு பெறுகிறது.

மூன்று நாட்களுக்கு கட்டணமில்லா தரிசனம்

இந்த ஆண்டுக்கான பங்குனி உத்திர நட்சத்திரம் 2025 ஏப்ரல் 10ம் தேதி பிற்பகல் 2.07 மணிக்கு தொடங்கி, 2025 ஏப்ரல் 11ம் தேதி மாலை 4.11 மணிக்கு முடிவடைகிறது. இதையொட்டி பழநி கோயில் நிர்வாகம் சிறப்பான ஏற்பாடுகளை செய்து வருகிறது. அந்தநாள்களில் ஆயிரக்கணக்கான பக்தர்கள் தரிசனம் செய்ய வருவார்கள் என்பதால், கோயிலில் தரிசன கட்டணம் ரத்து செய்யப்படுகிறது. தைப்பூசத் திருவிழாவின் போன்று, இந்த விழாவுக்கும் மூன்று நாட்களுக்கு கட்டணமில்லா தரிசனம் அமலாக்கப்படுகிறது.

பொதுமக்கள் வசதிக்கான ஏற்பாடுகள்

பாதயாத்திரையாக வரும் பக்தர்களுக்காக புதிய மற்றும் பழைய தாராபுரம் சாலைகள் மற்றும் உடுமலை நெடுஞ்சாலையின் அருகே நிழற்பந்தல்கள், இளைப்பாறும் மண்டபங்கள் அமைக்கப்பட்டுள்ளன. இரவு நேரங்களில் பாதுகாப்பிற்காக ஒளிரும் குச்சிகள் மற்றும் கை பேண்டுகள் பக்தர்களுக்கு வழங்கப்படுவதாக கோயில் இணை ஆணையர் மாரிமுத்து தெரிவித்தார்.

அன்னதானம் திட்டம்: 2 லட்சம் பக்தர்களுக்கு உணவு

பங்குனி உத்திர விழாவை முன்னிட்டு, ஒரு நாளைக்கு 20,000 பேர் வீதம், மொத்தமாக 2 லட்சம் பக்தர்களுக்கு அன்னதானம் வழங்கப்படும் என கோயில் நிர்வாகம் அறிவித்துள்ளது. இதற்கான உத்தரவை தமிழக முதல்வர் மு.க. ஸ்டாலின் வழங்கியுள்ளார். பக்தர்கள் பசியுடன் இருக்கக் கூடாது எனக் கருத்து கொண்டு, இந்த சிறப்பு ஏற்பாடுகள் மேற்கொள்ளப்படுவதாக அமைச்சர் தெரிவித்தார்.