மதுரை சித்திரைத் திருவிழா 2025: அன்னதானம் வழங்க புதிய வழிகாட்டுதல்கள் வெளியீடு
Madurai Chithirai Festival: மதுரை மீனாட்சியம்மன் கோவில் சித்திரைத் திருவிழா 2025 ஏப்ரல் 29-ல் தொடங்கி 12 நாட்கள் நடைபெறவுள்ளது; 30 லட்சம் பக்தர்கள் வருவார்கள் என எதிர்பார்க்கப்படுகிறது. இந்த நிலையில் அன்னதானம் வழங்க விருப்பமுள்ளோர் FSSAI இணையதளத்தில் அனுமதி பெற்றுவிட்டு, செயற்கை சாயம், பிளாஸ்டிக் தவிர்த்து சுத்தமாக வைத்திருக்க வேண்டும் என அறிவுறுத்தப்பட்டுள்ளது.
மதுரை சித்திரைத் திருவிழாவில் அன்னதானம் வழங்க புதிய வழிகாட்டுதல்
மதுரை ஏப்ரல் 17: மதுரை மீனாட்சியம்மன் கோயிலில் (Madurai Meenakshi Amman Temple) சித்திரைத் திருவிழா (Madurai Chithirai Festival )2025 ஏப்ரல் 29-ல் தொடங்குகிறது; 12 நாட்கள் நடைபெறும் விழாவிற்கு 30 லட்சம் பக்தர்கள் வருவார்கள் என எதிர்பார்க்கப்படுகிறது. 2025 மே 12-ம் தேதி கள்ளழகர் வைகை ஆற்றில் இறங்கும் நிகழ்வில் மட்டும் லட்சக்கணக்கானோர் திரளும் என கணிக்கப்பட்டுள்ளது. பக்தர்களுக்கான சுகாதாரம், குடிநீர், சாலை மற்றும் மருத்துவ வசதிகளை மாநகராட்சி ஏற்பாடு செய்கிறது. அன்னதானம், நீர், மோர் வழங்கும் நபர்கள் செயற்கை சாயம், பிளாஸ்டிக் பொருட்கள் தவிர்க்க வேண்டும் என அறிவுறுத்தப்பட்டுள்ளது. அத்துடன், கழிவுகள் முறையாக குப்பைத்தொட்டியில் போட வேண்டும் என்றும், உணவுப் பொருட்களுக்கு இந்திய உணவு பாதுகாப்பு மற்றும் தரநிலைகள் ஆணையம் (FSSAI) இணையதளத்தில் அனுமதி பெற வேண்டும் என்றும் கூறப்பட்டுள்ளது.
மதுரை மீனாட்சியம்மன் கோவில் சித்திரைத் திருவிழா
மதுரை மீனாட்சியம்மன் கோவில் சித்திரைத் திருவிழா, 2025 ஏப்ரல் 29-ஆம் தேதி கொடியேற்றத்துடன் சிறப்பாக தொடங்கவுள்ளது. மொத்தம் 12 நாட்கள் நடைபெறும் இந்த புனித விழாவில், பட்டாபிஷேகம், திருக்கல்யாணம் மற்றும் தேரோட்டம் போன்ற முக்கிய ஆன்மிக நிகழ்வுகள் நடைபெற உள்ளன. இவ்விழாவுக்கு வருடாவருடம் போலவே, லட்சக்கணக்கான பக்தர்கள் சமர்ப்பணத்துடன் கலந்து கொள்வார்கள் என எதிர்பார்க்கப்படுகிறது.
மே 12-ல் ‘கள்ளழகர் வைகை ஆற்றில் இறங்கும் விழா’
2025 மே 12-ஆம் தேதி திருவிழாவின் முக்கிய நிகழ்வாகக் கருதப்படும் ‘கள்ளழகர் வைகை ஆற்றில் இறங்கும் விழா’ நடைபெற உள்ளது. அந்த நாளில் மட்டும் வைகை ஆற்றங்கரையில் லட்சக்கணக்கான பக்தர்கள் திரண்டுவிடுவார்கள் என மதுரை மாநகராட்சி தகவல் தெரிவித்துள்ளது. கடந்த ஆண்டில் 12 நாட்கள் விழாவுக்கு 25 லட்சம் பக்தர்கள் வந்திருந்த நிலையில், இந்த ஆண்டு 30 லட்சம் பக்தர்கள் வருவார்கள் என மதிப்பீடு செய்யப்பட்டுள்ளது.
இதற்கான அடிப்படை வசதிகள் மற்றும் பொது சேவைகளை மேம்படுத்தும் பணிகளில் மாநகராட்சி தீவிரமாக ஈடுபட்டுள்ளது. குடிநீர், சுகாதாரம், சாலை அமைப்பு, மருத்துவம் உள்ளிட்ட அனைத்து வசதிகளும் உருவாக்கப்பட உள்ளன.
அன்னதானம் வழங்க விதிமுறைகள் அறிவிப்பு
சித்திரைத் திருவிழாவின் ஒரு பகுதியாக, பக்தர்களுக்கு அன்னதானம், நீர் மற்றும் மோர் வழங்க அனுமதிக்கப்படும் விதிமுறைகள் குறித்து மாவட்ட கலெக்டர் சங்கீதா அறிவிப்பு வெளியிட்டுள்ளார்.
அன்னதானம் வழங்கும் இடங்களில் செயற்கை சாயம் கலந்த உணவுகள் விலக்கப்பட வேண்டும். அதேபோல், தமிழ்நாடு அரசால் தடை செய்யப்பட்ட பாலிதீன் பைகள் மற்றும் பிளாஸ்டிக் கப்புகளும் பயன்படுத்தக்கூடாது. அன்னதானம் பெற்றதும், உணவுப் பாட்டில்கள், தட்டுகள் போன்ற கழிவுகளை மாநகராட்சி குப்பைத்தொட்டிகளில் இட்டு சுத்தமாக வைத்திருக்க வேண்டும்.
அன்னதானம், நீர்மோர் மற்றும் குடிநீர் வழங்க விருப்பமுள்ளவர்கள் https://foscos.fssai.gov.in என்ற இணையதளத்தில் ரூ.100 கட்டணம் செலுத்தி பதிவு செய்து உணவு பாதுகாப்பு துறையின் அனுமதியை பெற வேண்டும்.
மேலும், உணவு மற்றும் உணவுப் பொருட்கள் தொடர்பான புகார்களை தமிழ்நாடு அரசு உணவு பாதுகாப்பு துறையின் வாட்ஸ்அப் எண் 9444042322-க்கு தெரிவிக்கலாம் எனவும் அறிவிக்கப்பட்டுள்ளது.