கலகலப்பான காமெடியுடன் வெளியானது நடிகர் சந்தானத்தின் டிடி நெக்ஸ்ட் லெவல் ட்ரெய்லர்

நடிகர் சந்தானம் (Santhanam) நடிப்பில் கடந்த 2024-ம் ஆண்டு இரண்டு படங்கள் திரையரங்குகளில் வெளியானது. வடக்குப்பட்டி ராமசாமி மற்றும் இங்க நான் தான் கிங்கு (Inga Naan Thaan Kingu) ஆகிய இரண்டு படங்களுமே ரசிகர்களிடையே நல்ல வரவேற்பைப் பெற்றது. இந்தப் படங்கள் திரையரங்குகளில் வெளியாகி விமர்சன ரீதியாகவும் வசூல் ரீதியாகவும் மாபெரும் வரவேற்பைப் பெற்றது தொடந்து நடிகர் சந்தானம் அடுத்தாக டிடி நெக்ஸ்ட் லெவல் படத்தில் நடிக்க கமிட்டானார். இந்தப் படத்தை இயக்குநர் பிரேம் ஆனந்த் இயக்கியுள்ளார். இந்தப் படத்தில் நடிகர் சந்தானத்துடன் இணைந்து நடிகர்கள் செல்வராகவன், கௌதம் வாசுதேவ் மேனன், மொட்டை ராஜேந்திரன், யாசிகா ஆனந்த் மற்றும் ரெடின் கிங்ஸ்லி என ஒரு பெரிய நர்சத்திர பட்டாளமே நடித்துள்ளது. இந்தப் படத்தின் ட்ரெய்லரைப் படக்குழு தற்போது வெளியிட்டுள்ளது.

நடிகர் ஆர்யாவின் தி ஷோ பீப்பிள் நிறுவனம் தயாரித்த இந்தப் படத்தின் ட்ரெய்லரில், சந்தானம் ஜெயிலரையும் படத்தின் இயக்குனர் நெல்சன் திலீப்குமாரையும் விமர்சிக்கிறார். மேலும் கௌதம் மேனன் தனது காக்க காக்க படத்தில் வரும் ‘ஓ மஹாசியா’ பாடலை ரீ கிரியேட் செய்கிறார். அதுமட்டுமின்றி, பழிவாங்கும் பேய்களை சந்திக்கும் சந்தானத்தின் உலகத்தைப் பற்றிய ஒரு தெளிவையும் இந்த டிரெய்லர் வழங்குகிறது.

நடிகர் கார்த்தி வெளியிட்ட எக்ஸ் தள பதிவு:

Kalakkunga bros…wishing you guys huge success this summer.https://t.co/Apfdv8NFAm#DevilsDoubleNextLevel#DhillukuDhuddu @iamsanthanam @arya_offl @TSPoffl @NiharikaEnt @iampremanand

— Karthi (@Karthi_Offl) April 30, 2025

வரவிருக்கும் படத்தில், சந்தானம் திரைப்பட விமர்சகராகவும், திரைப்பட தயாரிப்பாளர்களால் வெறுக்கப்படும் ஒருவராகவும் நடிப்பதாகக் கூறப்படுகிறது. டிடி நெக்ஸ்ட் லெவலுக்கு இசையமைப்பாளர் ஆஃப்ரோ இசையமைத்துள்ளார். பரத் விக்ரமன் எடிட்டிங் செய்துள்ளார். தீபக் குமார் பதி ஒளிப்பதிவு செய்துள்ளார். இந்தப் படத்தை ஆர்யாவின் தயாரிப்பு நிறுவனத்துடன் நிஹாரிகா என்டர்டெயின்மென்ட் இணைந்து தயாரித்துள்ளது. தமிழ் தவிர, டிடி நெக்ஸ்ட் லெவல் தெலுங்கு மற்றும் இந்தி மொழிகளிலும் வெளியிடப்படும் என்று தெரிவிக்கப்பட்டுள்ளது.

தில்லுக்கு துட்டு திரைப்படத் தொடர்ச்சி முதன்முதலில் 2016 ஆம் ஆண்டு ராம்பாலா இயக்கிய திகில் நகைச்சுவைத் திரைப்படத்துடன் தொடங்கியது. அவர் மீண்டும் தில்லுக்கு துட்டு 2 படத்தை இயக்கினார், இது 2019 இல் வெளியிடப்பட்டது. மூன்றாவது படமான டிடி ரிட்டர்ன்ஸ் 2023 இல் வெளியிடப்பட்டது, இதை பிரேம் ஆனந்த் இயக்கியுள்ளார். இந்தப் படங்கள் பாக்ஸ் ஆபிஸில் நல்ல வசூலை ஈட்டின என்பது குறிப்பிடத்தக்கது.